ARAPAWA

2007-02-01T14:59:00.000-08:00

Mi travelmate heisst Paula, ds Outo heisst Gregor. Mit dene beide bini iz ungerwaegs.

Vorhaer hani 2 Wuche im Backpackers in Punakaiki gschaffet. Wobi schaffe isch chli uebertribe, es het no ging 3-4 angeri wwoofer gah, und mir hei immer vo 10-2 bettet & putzt und au 2 Tag ds zwoeite Brot & Muffins bachet am Morge. Dr Backpacker ligt am Rand vom Paparoa National Park, zmitts im Raegewaud, 5 min. vom Meer. Aber ds Meer isch hie z ruch zum bade. Aber ga Kajak fahre im Fluss simer und viu ga wandere im Raegewaud.

Paula, Gregor & i si afe ufe Arthurs Pass gange, hei doert Wanderige gmacht, di erschti im Raege, und da mer im Outo ufere DOC-Campsite uebernachtet hei, hei mer niene uesi Sache choenne troechne, drum simer ine Beiz gange und hei doert uesi Sache vorem Fuer ufghaenkt. Di zwoeiti Wanderig isch zur Avalanche Peak gange, isch raecht hert gsi und mir si i Schnee cho! Has chum choenne gloube.

Mir hei auso 3 Naecht im Outo verbracht und si no einisch uf Punakaiki zruegg fuer verschiednigi Sache, Luett bsueche, jage, ritte, Chinese Hot Pot aesse usw. Huet goemer Richtig Hokitika, naechschti Destinatione si naer Fox Glacier, Queenstown, Te Anau, Milford Sounds.

Yiihaaaaa! :)

2007-01-23T18:50:00.001-08:00

I ha e gueti Zitt hie z Punakaiki im Backpacker. Punakaiki het di beruehmte Pancake Rocks, und mir si oeppe 3 km dervo entfernt. Dr Backpacker ligt am Rand vom Paparoa National Park und ligt zmitts im Raegewaud. Es si no 3 angeri wwoofer hie. Mir muesse immer nume vo 10-2 schaffe und naechaer ungernaeme mer oepis, Kajak fahre oder meistens mache mer irgend e Track. Aus naechschts gani mit dr Paula witters, di hani hie kenne glehrt und si wott i di glichi Richtig woni und hett es Outo. Mir goe Richtig Arthurs Pass, naechaer Fox Galcier, naechaer Queenstown, Te Anau & Milford Sound!

2007-01-23T18:50:00.000-08:00

2007-01-08T22:23:00.000-08:00

Sunneufgang Tory Channel - Ig bide Paua-Tanks (bi am absuge) - und so gsehts us doert woni bi gsi!

Huet bini ds Picton acho und dadermit geit mini Zitt uf Arapawa-Island z aend (i ha mit emne Elektriker wo huet grad uf dr Paua-Farm het gschaffet & sire Familie i ihrem Boot choenne mitritte uf Picton, naer heisi ds Boot mitem Outo usem Wasser zoge & mi sogar bi mim Backpacker abgladt!)
I bi 2 Wuche uf dr angere Site vo Arapawa-Island, bi Radons, uf dr Arapawa-Seafarm gsi. I ha vor auem z tue gha mit Paua, das si Muschle, wo si hie zuechte. D Muschuschale waerde brucht fuer Schmuck, das isch hie naebem Greenstone es viu bruchts Materiau fuer Schmuck. Si hei mehreri 1000 Pauas i verschidnige Stadie: i ha vor auem mit de grosse z tue gha. D.h. i ha au Tag Taenk mit Pauas dinne muesse reinige und d Pauas mit Seegras fuettere.Suesch hani ou im Garte gschaffet, ha Zueg gstriche usw. Radons hei 3 Feriehueser uf ihrem Grundstueck und woeu ja ize ds NZ Summerferie si, si doert Luett dinne gsi. I ha mi guet mitne verstange. Am Siuvester heimer es Lagerfuer am Strand gha. Ah ja und ar Wiehnachte bini ja no bi Denizes gsi, mir hei Luet iglade gha usw. Aber es chunnt hie irgendwie nid eso Wiehnachtsstimmig uf... mir si ga fische am 25. ...I ha eine vo de cheutere Suemmer verwuetscht bis ize! Zum Teu loufi mit dr Chappe desume...
Ide letschte Taeg isch ou no e angeri wwooferin da gsi vo Duetschland, d Elke. Si isch 63!
Iz bini aebe ds Picton und ga morn witter uf Nelson, bsueche doert e Familie wo im Bus wohnt und ga naer uf Punakaiki ar Westkueste woni de imne Backpacker schaffe!

2006-12-19T20:31:00.000-08:00

ups, e hai....

2006-12-17T01:57:00.000-08:00

Once upon a time an island
Was bisher geschah…

I probiere mau e grobi Zaemefassig z mache vo daem wasi bis iz aus erlaebt ha.
Auso Die Wuche Australie mitem Simi & Anne & Ruedi isch es Kapitu fuer sich J. Doert hani so viu erlaebt das gub grad e Zaemefassig fuer sich. Es isch ufjedefau schoen gsi.
Naer bini ja uf Christchurch gfloge, bi doert uebernachtet und naer mitem Bus uf Nelson, womi dr Hannes Krummenacher abghout het. I bi e Wuche bi Krummenachers gsi, das si mega liebi Luet.
Naer bini uf Picton gfahre und ha doert naer ds Mailboat gno ufd Arapawa-Island. D Familie Denize besteit us em Tasman,8, dr Summer,10, dr Coral,13, er Eian und em Mark, beidi oepis ueber 40. Si si naett, und mittlerwile chumi ou mitem Mark z schlag.
D Insle isch dr Troum. Si hei 150 ha Land. Das heisst weme umds Hus umeluegt und dr Huegu zdueruf ghoert aus ihne. Usserd em Strand, em Shed, em Garte und rund umds Hus ume isch aues Bush.
Si betribe aus mit Solar-, Wind- und Wasserenergie.
Einisch isch e Familie z Bsuech cho wo absolut saebschtversorgend isch. Di hei ihres Hus saeuber boue, hei Tier und pflanze aus saeuber a. Naer mache si Tuschgschaeft mit angerne, z.B. Fleisch gaege Fisch usw. So naeme si nie Gaeud id Hang.
Dr Peter und d Takutai hei d Tipis hie am Strand, wo Gruppe choeme cho uebernachte, meistens Schueugruppe. Und de mache si mitne gfuehrti Toure mitem Schiff ide Marlborough Sounds.
Ig und di 2 angere wwoofer vo Frankrich, d Claude und dr Vincent, si einisch mit ufene Tour mitere Maori-schueuklass. Mir si uf verschidnige Insle ide Sounds gsi, z.B. doert wo dr Cook glandet isch woner Neuseeland entdeckt het. I bi ziemlech beidruckt vode Maoris, es isch es guets Erlaebnis gsi.

Wasi hie so mache? Aebe es Tipi hani ghoufe boue, das isch raecht ufwaendig, mit Houzbode und so, naer hani bim Shed ghoufe Faenschter inemache, im Garte gits immer oepis z tue, es Huehnerhus heimer gmacht, Gorse usstaeche, Kompost mache, Rase maeie (brucht dr ganz Tag), im Hushaut haeufe, Wiehnachtsguetzi bache, fische, schwuemme, wandere oder besser ide Huegu versueche ufene gruene Zweig z cho besser gseit sech e Waeg duere Bush schla J, Kajak fahre,…

I chume grad zruegg vo 6 Taeg Wellington. Denizes hei doert es Hus wosi am renoviere si gsi (Huet si di noeie Luet inegange). Woeus keni Moebu im Hus het, hei mer eifach dinne campet, am Bode gschlafe und so... I ha viu putzt, gstriche usw. Und naebedra Wellington entdeckt. Wie a aune Orte hie z Neuseeland merkt me ou ds Wellington dass im Gaegesatz z.B. zu Europa das Land nonid so lang bevoeukeret isch. I merkes am meischte ade Gebaeude. Di erschte Maori si im 13. oder 14. Jh. cho, d Europaer im 18. Jahrhundert. Aus isch relativ jung. Neuseeland isch ja aus grueni Insle bekannt. Das isch si ou, aber nid wuerklech. Viu Neuseelaender hei nid wuerklech es Umwaeutbewusstsi, woeu bi ihne no aus ir Ornig isch und vo auem gits gnue, ou woeus nume ca. 4 Mio. Luet het. Aber das isch im Wandu.

Iz blibi no bis Aends Jahr bi Denizes und naer gani witters.

Fuer Details und paersoenlecheri Sache please contact me :).

D Claude & dr Vincent hei e gueti Homepage wo ou Sache ueber d Arapawa-Island und me ueber das womer erlaebt hei dinne steit:http://www.g-mal-o-pieds.com -Carnet de voyage- Arapawa-Island

2006-12-01T19:46:00.000-08:00

es versunknigs Schiff uf Arapawa -
Marlborough Sounds (Ussischt vore angere Insle, womer mit dr Maori-Schueuklass haere si) -
Ussicht vo Stingray Bay

2006-12-01T19:27:00.000-08:00

Rabbit Island i der Noechi von Nelson
Claude, Ellie & Vincent im Bush (Waege hets fasch keni, nume settigi vo wiude Geisse & Wiussoei)
Ufem hoechschte Punkt vo Arapawa
Das isch ds Huus...

2006-11-28T20:11:00.000-08:00

So gsehts uf dr Arapawa-Island us. Bilder sagen mehr als Worte...